蘋果日報| 2014-10-07

報章| B07 | 投資| 異動空間| By 魏力

異動空間：穩守突擊揀藥股

占中未見惡化，港股反彈，恒指一個月以來首次連升兩日，重上牛熊線（現處23172），但成交縮至726億元，市場驚魂未定，唔敢掃貨人之常情。早市淡友且戰且走，壓住指數平淡倉食糊，至午市掃貨實盤殺到，帶動恒指抽升，形勢利後市進一步反彈。以黃金比率0.5倍計，恒指上望23800點，即約100日線水準，屆時再定去留。

濠賭股挾爆淡倉，升得又急又勁，但受打貪、經濟放緩、貴賓廳收入急插等打擊，基本面已散，有反彈冇上升，短炒可以，長不宜。明年有新賭場落成，恐令行業進入供過於求的局面。

留意呢兩日反彈，資金率先追捧港交所（388），低位大漲8%，可視為指標股，睇住佢炒其他，加上AH折讓股仍強勢，反映滬港通主題仲未完。另半新股不少又創新高，早排推介的中機租賃（1848）、綠色動力（1330）、城建設計（1599）及博大綠澤（1253）走勢靚爆，強者越強要吼實。醫藥股也是必買板塊，主打心血管藥的東瑞製藥（2348），PE、PB均較四環（460）折讓兩成以上；預測今年多賺三成，市值細潛力更佳，目標先睇9蚊。